Lóðaskilamál: Borgarstjóri réttlætir lögbrot með peningaleysi

Fjölmiðlamenn virðast ekki átta sig á einu grundvallaratriði í lóðaskilamálinu og það er að borgarstjóri er að réttlæta lögbrot, brot á jafnræðisreglu stjórnsýslulaga, með peningaleysi. Embætti borgarstjóra slær þá blindu og slævir þeirra skyldu til gagnrýnnar hugsunar.

Lögbrotið hefur nú verið staðfest 11 sinnum þ.e. 8 sinnum í úrskurðum ráðuneytis sveitarstjórnarmála og 3 sinnum hjá Héraðsdómi. Brot á jafnræðisreglu stjórnsýslulaga er lögbrot, kæru fjölmiðlamenn. Lögbrot er ekki hægt að réttlæta með peningaleysi og allra síst hjá kjörnum fulltrúum.

Í viðtali í kvöldfréttum RÚV í gær staðfesti borgarstjóri hátt og skýrt að hún væri að brjóta lög en það væri í lagi því borgarsjóður væri tómur. Það væri hennar hlutverk að verja borgarsjóð jafnvel þó það kostaði lögbrot. Þetta viðtal borgarstjóra styrkir gríðarlega málflutning okkar.

Borgarstjóri hefur af veikum mætti reynt að réttlæta málflutning sinn með vísan í dóm Héraðsdóms frá í desember 2009 sem féll borginni í hag en það er eini úrskurðurinn af 12 sem þannig hefur fallið. Borgarstjóri veit þó betur.

Desember málið er frábrugðið í veigamiklum atriðum í samanburði við öll hin 11 málin. Brimborg, eins og allir aðrir lóðarhafar nema sá í fyrrgreindu máli, hefur byggt málflutning sinn á því að Reykjavíkurborg hafi brotið stjórnsýslureglur gagnvart félaginu, þar með talda jafnræðisregluna. Ráðuneytið og Héraðsdómur fallast á þessi rök en þessi slælega stjórnsýsla var ekki til umfjöllunar í fyrrgreindum dómi sem féll borginni í hag.

Það er til marks um lítið vægi þessa desember dóms Héraðsdóms Reykjavíkur að hvorki lögmaður Reykjavíkurborgar né dómarinn í hinum þremur héraðsdómunum lítur til þess dóms í málflutningi sínum eða rökstuðningi. Hefði maður haldið að hæg væru heimatökin þar sem um sama dómstól og tiltölulega nýjan dóm er að ræða. Það væri vert hjá fjölmiðlamönnum að spyrja lögmann borgarinnar út í ástæður þessa.

Slælega stjórnsýslan felst í því að Borgin hefur alla tíð tekið við og krafist þess að lóðum sé skilað ef af einhverjum ástæðum lóðarhafi hættir við að byggja. Undantekningarlaust og án nokkurs fyrirvara hefur borgin endurgreitt lóðarhöfum. Þetta er sannað í málflutningi í þremur málum í Héraðsdómi sem borgin tapaði í vikunni og sönnunin byggist meðal annars á skýrslutöku yfir tveimur starfsmönnum Reykjavíkurborgar þ.á.m. háttsettum starfsmanni sem ber ábyrgð á lóðaskilum.

Allt í einu og án nokkurrar tilkynningar hættir Borgin þessari framkvæmd en tilkynnir ekki formlega um breyttar reglur fyrr en 27. nóvember 2008 og lætur þær virka afturvirkt til 1. október 2008. Það er vond stjórnsýsla og er lögbrot. Það skilja næstum allir.

Lóðaskil gætu kostað borgina milljarða

Athugasemdir

[Marinó G. Njálsson, 8.5.2010 kl. 22:23]

Já, þetta er merkilegur útúrsnúningur borgarstjóra.  Staðfest er að menn mega ekki selja lóðirnar, hvernig getur það þá verið að þeir megi ekki skila þeim.

Það verður fróðlegt að fylgjast með niðurstöðu Hæstaréttar og síðan líklegast skaðabótamálunum sem munu fylgja.

[Landfari, 10.5.2010 kl. 22:21]

Ég spurði þig um það hér í annari blogfærslu Egill hvort það hefði verið fellt út í þessum nýju reglum um að ekki sé hægt að skila lóðum, að ekki megi selja þær.

Þú svaraðir því ekki beint en nú segir Marinó að það sé enn í gildi að ekki megi selja þótt nýju reglurnar segi að ekki meigi skila.

Er þetta rétt og ef svo er hvernig rökstyður borgin þetta?

[Egill Jóhannsson, 10.5.2010 kl. 23:13]

Landfari. Ég hélt ég hefði upplýst um þetta en ef ekki þá geri ég það nú. Marinó meinar að eldri reglurnar voru þannig að bannað var að framselja en skylda að skila.

Á borgarráðsfundi 20. nóvember 2008 breytti borgin reglunum og leyfði framsal en bannaði skil. Gallinn við þá ákvörðun var að hún var kynnt lóðarhöfum 27. nóvember 2008 en látin gilda afturvirkt frá 1. okt. 2008.

Þeir sem skiluðu FYRIR 1. okt. fengu endurgreitt. Þeir sem skiluðu eftir 1. okt. fengu ekki endurgreitt.

[Landfari, 11.5.2010 kl. 12:10]

Veistu hvað býr á bakvið þessa dagsetningu þegar hún er ákveðin svona eftirá. Voru helstu styrktaraðila búnir að skila þá eða við hvað var miðað fyrst ekki var miðað við dagsetningu saþykktanna.

Reyndar hefði ég nú haldið að þessar reglur geti eingöngu gilt um lóðir úthlutaðar eftir 27 nóv. 2008, nema í úthlutunarskilmálum sé fyrirvari um að breyta megi samningnum einhliða hvað þetta atriði varðar.

[Einhver Ágúst, 11.5.2010 kl. 12:39]

Engar áhyggjur Egill, Bezt fer að koma og redda þessu....

Beztu kveðjur Einhver Ágúst 13 sæti Bezta flokksins(sem einnig keyrir um á forláta Toyota Corolla Station 200 módel sem einmitt var keypt í Brimborg, svo öll "tengsl" séu uppi á borðinu.)