Lýðveldisbyltingin: Stofnun, þróun og tortíming

Það er mjög áhugavert hvernig tiltekið andrúmsloft kallar fram hugmyndir. Hugmyndin um nýtt, sjálfseyðandi lýðræðisbreytingaafl, er þannig hugmynd. Hún var orðin til hjá fjölda einstaklinga á svipuðum tíma og bara spurning hvenær hún færi á flug. Ég setti hana fram á bloggginu 8. janúar og sjaldan ef nokkurn tíma hef ég fengið jafn sterk viðbrögð.

Rót hugmyndarinnar er upplifun meginþorra fólks á því að lýðræðið sé ekki að virka og að það sé í raun ekki lýðræðisleg umræða í samfélaginu um stór og mikilvæg málefni. Búið sé að stífla uppsprettu lýðræðislegrar umræðu. Uppsprettan er Alþingi.

Ef þar færi fram hin raunverulega lýðræðislega umræða þar sem málin væru krufin til mergjar, í nefndum og þingsölum, af fagmennsku þá myndi andrúmsloft rökræðu seitla út í samfélagið með tíð og tíma. Rök yrðu notuð í umræðu en ekki slúður, upphrópanir og sleggjudómar. Fjölmiðlar yrðu betri. Stjórnmálaflokkar yrðu betri. Við yrðum betri. Eftir höfðinu dansa limirnir. 

Eins og staðan er í dag er því miður engin von til þess að núverandi flokkakerfi komi á þeim róttæku breytingum sem nauðsynlegar eru til að fyrrgreind markmið næðust. Uppspretta lýðræðislegrar umræðu, Alþingi, er í dag haldið í gíslingu af framkvæmdavaldinu sem aftur er í höndum flokkseigenda og fámennrar klíku. Samfélagið hefur í kjölfarið gefist upp á að taka þátt í umræðunni. Niðurstaðan risahvellur. Allir sitja í súpunni.

Því þarf að stofna nýtt afl sem hefur ekkert annað markmið en að fara í kosningar með nákvæmlega útlistaðar tillögur, frumvörp, að breyttu stjórnskipulagi, ná miklu fylgi, koma í gegn breytingum, boða aftur til kosninga og tortíma síðan sjálfu sér.

Sumir hafa nefnt stjórnlagaþing sem annan kost. Jú, það er kostur en helsti gallinn við þá hugmynd er að þá þarf samþykki núverandi flokkakerfis. Segjum að það næðist í gegn. En þá er spurning hver niðurstaðan yrði? Væri hún ekki áfram menguð af sérhagsmunum núverandi flokka og þeirra klíka sem þeim tengjast? En stærsti ókosturinn væri sá að þá væri engin pressa frá þjóðinni sem vissulega kæmi í gegnum afl sem hefði ótrúlega skýrt umboð til að klára málið á Alþingi.

Margir vilja að hugmyndin um nýja aflið sé tekin lengra. En spurningin er hvernig? Tillagan sem ég er hrifnastur af kom í athugasemd á bloggið. Það væri að útbúa vefsvæði á svokölluðu Wiki formi. Þar myndi hugmyndin fá að þróast hratt enda mættu allir sem það vildu koma að málinu.

Ég var varla búinn að lesa athugasemdina þegar mér barst póstur á föstudaginn þar sem Anna Helgadóttir tók frumkvæði að því að bjóðast til að sækja um lén og setja vefinn upp. En afhverju þessi leið? Leyfið mér að útskýra.

Þegar innleiða þarf breytingar þá þarf að reyna að greina tíðarandann og um leið rót vandans. Málið er að gagnrýnin í samfélaginu í dag beinist að lýðræðinu og hvernig það hefur þróast út í flokksræði með sínu sérhagsmunapoti og spillingu í kjölfarið. Á sama tíma hefur traustinu í samfélaginu verið tortímt. Því hlýtur nýtt afl að þurfa að gera hlutina alveg öfugt við hefðbundin vinnubrögð núverandi flokka.

Virkja grasrótina. Skapa trúverðugleika. Það verður að líta mjög raunsætt á hlutina og maður verður stöðugt að efast um sjálfan sig og hugmyndir sínar. Átta sig á því að þó maður trúi því sjálfur að maður sé með bestu hugmyndina og telji sig alveg strangheiðarlegan í að vinna að henni þá eru einfaldlega ekki allir sammála því. Efinn er alltaf til staðar. Því þarf að leggja svo mikla rækt við trúverðugleikann. Ein leið til að gera það er að hafa allt upp á borðinu. Allt.

Draumur minn um útfærslu er útópískur. Best væri ef grasrótin tæki tillöguna upp og héldi áfram að þróa hana. Enginn gæti því gert kröfu til eignarhalds á tillögunni. Þetta er allt of stórt mál til að hægt sé að leyfa egóinu að þvælast fyrir.

Vefsvæði er sett upp þar sem allir geta tekið þátt í að þróa aflið og markmið þess. Engir leynifundir til undirbúnings. Öll rifrildi fyrir opnum tjöldum. Enginn útilokaður og jafnvel flokksbundið fólk í öðrum flokkum velkomið. Helst enginn formaður. Kannski gjaldkeri eða ráða endurskoðanda til að sjá um gjaldkeramál. 

Fjármagn þarf til að kaupa sérfræðiráðgjöf varðandi smíði á frumvarpi og ýmislegt fleira. Þá þarf að safna pening. Engin leynd þar. Þeir sem vilja styrkja verða að gefa upp nafn. Það birtist á vefnum. Hámarks upphæðir ákveðnar.

Spurning vaknar hvort leyfa eigi nafnleysi við uppfærslu á vefnum. Auðvitað væri það andstætt hugmyndinni um að allt sé uppi á borðinu en um leið skiljanlegt miðað við það þjóðfélag sem við búum við og ætlum að breyta. Ég leyfi nafnleysi á mínum bloggvef og engin ritskoðun, allt fer inn og athugasemd hefur aldrei verið eytt og aldrei lent í vandræðum.

Þeir sem eru nafnlausir þurfa, að mínu mati, í raun einfaldlega að leggja meira á sig, ekki minna, til að verða trúverðugir. En hvernig er þetta annars á wikipedia?

Nú er verið að setja upp vefinn og allir hvattir til að hjálpa. Vefurinn heitir lydveldisbyltingin.is en hann er ekki farinn að virka strax en vonandi á morgun.

Ég vil að lokum ítreka, eins og ég fór inn á hér að ofan, að ég lít alls ekki á þetta framtak sem mína eign og geri ekki nokkrar kröfur til eins né neins. Það væri enda í andstöðu við grasrótarhugmyndina. Hér skrifa ég bara hugrenningar mínar án þess að vita nokkuð til hvers þær leiða en vonandi tekur grasrótin þær yfir og þróar áfram. Og ég með.

Fullur salur í Háskólabíó

Athugasemdir

[Sigurður Hrellir, 13.1.2009 kl. 00:49]

Gott mál - þetta þarf nefnilega að gerast mjög hratt.

[Bjarni Harðarson, 13.1.2009 kl. 00:52]

Sæll Egill. Ég hef fylgst með umræðunni hér á vefnum hjá þér og er mjög hrifinn - en ekki þar með sagt endanlega sannfærður. Ég held að það sé rétt og sjáfur komist að sömu niðurstöðum með svolítið annarri nálgun að flokkakerfið er ein af meginrótum vandans. Hér er flokksveldi en ekki lyðveldi eins og Njörður P. hefur orðað það svo snilldarlega. En svo ég sé hreinskilinn þá finnst mér hugmyndin um tortímandi flokkinn svolítið of súrrealísk til að geta virkað. Hún getur það alveg ef umtalsverður fjöldi, t.d. 20% sameinast um hana en verður það? Frumskoðanakönnun er kannski forsenda áframhaldandi starfs...

[Helga (IP-tala skráð) 13.1.2009 kl. 01:01]

Mér líst afskaplega vel á þetta og segi takk fyrir mig.  Ætla aðeins að leyfa mér að hafa skoðun á nafnleysi. Mér finnst mjög mikilvægt að einstaklingar ráði sjálfir hvort þeir skrifa undir sínu rétta nafni eða ekki. Vegna þess að ýmsir eru í þeim sporum að geta ekki skrifað undir nafni. Við verðum öll að gera þá kröfu á okkur að geta tekið afstöðu til málsins en ekki að greina málefnið í ljósi þess hver skrifar. Og aftur þakkir til þín og annarra sem ég veit ekki hverjir eru sem hafa hrint hugmyndinni af stað.

[Egill Jóhannsson, 13.1.2009 kl. 01:07]

Takk, Sigurður.

Sæll Bjarni: Endilega hreinskilni hér á þessu bloggi. Já, ég er sammála að hugmyndin er súrrealísk enda ástandið hér á landi þannig. Því þarf útópískar lausnir.

Ég ætla líka að vera hreinskilinn og segja að mér finnst tillagan um frumskoðanakönnun dáldið týpísk fyrir núverandi vinnubrögð í núverandi flokkakerfi. Hægfara skref. Nú þarf byltingu, Bjarni. Þú kemur bara með. Hjálpar til að breyta og býður þig síðan fram eftir nýja kerfinu í eigin flokki eða einhverjum núverandi flokka.

Mín skoðanakönnun er einfaldlega tilfinning mín fyrir tíðarandanum. Ef hún er röng só be it. Ef rétt þá frábært. Setjum frekar hugmyndina í loftið. Fáum viðbrögðin og það er besta skoðanakönnunin. Ef ekkert gerist nú þá er það bara svoleiðis.

Ég held að hægt væri að ná 20% fylgi. Jafnvel 30% ef nægur trúverðugleiki næst. Það myndi duga til að hrófla við núverandi flokkakerfi.

[Egill Jóhannsson, 13.1.2009 kl. 01:10]

Takk Helga.

Ég er reyndar á sömu skoðun og þú og hef ekki áhyggjur af nafnleysi hvað þetta varðar. Ég myndi því mæla með að það yrði leyft.

[Hólmfríður Bjarnadóttir, 13.1.2009 kl. 01:20]

Mér lýst vel á umræðuvefinn og tel að þar geti skapast góður og frjór jarðvegur fyrir hugmyndir og hugmyndavinnu. Þó ég sé enn á því að stjórnlagaþing sé leiðin, þá hafna ég engu. Við höfum ekki ráð á slíku, það verður að virkja grasrótina og þá miklu orku sem brotist hefur út í reiðinni. Þessu má líkja við borholu á háhitasvæði sem verið er að beisla

[Sæmundur Bjarnason, 13.1.2009 kl. 01:21]

Er alveg sammála þér um þetta. Bloggaði svolíið um það sjálfur og minnir að ég hafi sett athugasemd um daginn. Ætlaði a.m.k. að gera það. Láttu okkur endilega vita þegar vefsvæðið kemst í gagnið.

[Egill Jóhannsson, 13.1.2009 kl. 01:27]

Sæl Hólmfríður:

Einmitt, ekki útiloka neitt en vera opinn fyrir öllu og málið er einmitt núna að virkja orkuna sem felst í reiðinni. Það var einmitt maður í Silfri Egils á sunnudaginn sem fór inn á það jákvæða við reiðina.

Sæll Sæmundur:

Já, ég mun láta vita um vefsvæðið.

[Sigurður Hrellir, 13.1.2009 kl. 01:38]

Mig langar bara að bæta því við að það er skoðun mín að það verði engin sátt um neitt sem núverandi ríkisstjórn býður upp á. Hún verður að taka afleiðingum gjörða sinna eða aðgerðaleysis þegar mikið bjátaði á og þarf að víkja. Þess vegna verður að fara þessa byltingarkenndu leið - stjórnlagaþing er erfiðara að sameinast um. Stjórnarskrárnefnd hefur verið starfandi í fjöldamörg ár án þess að nokkur breyting hafi verið gerð! Passið ykkur svo á því að flokkarnir munu reyna að koma til móts við þessar hugmyndir og lofa bót og betrun.

[Egill Jóhannsson, 13.1.2009 kl. 01:43]

Sigurður

Þó ég vilji ekki útiloka þennan kost þá er það sem þú nefnir einmitt málið sem ég óttast. Þa er að þessi skyndilegi áhugi á því að stofna til stjórnlagaþings og virkja stjórnarskrárnefnd sem hefur fundað árum saman án afgerandi niðurstöðu sé runnin undan rifjum þeirra sem nú þegar eru hluti af vandamálinu.

Þetta sé útspil til að geta séð sjálfir um að móta tillögur þannig að þær verði ekki of róttækar.

[Geir Guðmundsson (IP-tala skráð) 13.1.2009 kl. 02:27]

Þakka þér Egill og Önnu Helga fyrir frumkvæðið að þessum wiki vef.  Það er ekkert því til fyrirstöðu að þjóðin fari strax að safna hugmyndum um form og innihald nýrrar stjórnarskár.  Alþingi hefur ekki tekis af neinu viti í rúm 60 ár að endurbæta stjórnarskárana.

Það væri hægt að stofna opið áhugamannafélag til undibúnings stjórnlagaþings.  Eftir ítarlegar umræður á wikivefnum hvernig slíkt stjórnlagaþing ætti að starfa, væri hægt að auglýsa eftir einstaklingum sem bjóða sig fram sem fulltrúa til stjórnlagaþings.  Eins og núverandi kosningar eru framkvæmdar, er kostnaðurinn um 500 - 1.000 kr á atkvæði, eitthvað sem flesti hafa efni á.  Með sjálfboðavinnu er hægt að ná kostnaðinum enn ferkar niður. Þeir sem eru illa staddir og geta ekki séð af 500 kr gætu sótt um styk í styrkarsjóð sem komið yrði upp.

Stjórnlagaþingið myndi síðan starfa fyrir opnum tjöldum (hugsanlega á vefnum) og allir gætu sent þinginu tillögur og endurbætur.  Ég er viss um að lögfræðingar, stjórnsýslufræðingar, stjórnmálafræðingar, heimspekingar og aðrir sérfræðingar myndu taka þátt í þeirri umræðu og senda stjórnlagaþinginu hugmyndir, gagnrýni og umsagnir.  Hlutverk stjórnlagaþingsins væri þá að rökræða og setja saman frumvarp til stjórnarskár, byggt á hugmyndum þjóðarinn og hugsanlega kæmi út úr þeirri vinnu 2 -3 útgáfur af nýrri stjórnarskrá fyrir Nýja Ísland.

Þá væri tvennt í stöðunni.  Í fyrsta lagi væri einfaldlega hægt að boða til Þjóðaratkvæðagreiðslu um þetta/þessi frumvarp/-vörp  til stjórnarskrár og ef mikill meirihluti þjóðarinnar myndi taka þátt í þeirri atkvæðagreiðslu, þá væri Alþingi, stjórnvöldum, dómurum og Forseta vart stætt á öðru en samþykkja niðurstöðuna og innleiða stjórnarskránna.  Að vísu höfum við séð mjög mikinn hroka hjá núverandi stjórnmálamönnum sem vilja hugsanlega ekki viðurkenna þetta sem rétta leið og að við séum ekki þjóðin. 

Í öðrulagi væri þá hægt að búa til eins máls stjórnmálahreyfingu/flokk eins og þú hefur stungið upp á og koma nýju stjórnarskránni þannig í gegn.   Þetta gæti verið stjórnmálaflokkur án stefnu en samt með ákveðin grunn þjóðfélagsgildi (t.d. lýðræði, réttlæti, jafnrétti, mannréttindi, frelsi, samábyrgð, sjálfbæri etc. ) sem mikill meirihluti þjóðarinnar samþykkir. 

Hinn nýi flokkur gæti samt sem áður greitt atkvæði um öll mál á Alþingi og þá eftir vilja þjóðarinn hverju sinni.  Einfaldlega væru framkvæmdar marktækar skoðannakannanir hjá þjóðinni í öllum mikilvægum málum, eða þá að komið yrði á fót vefkosningakerfi, þar sem þjóðin gæti sjálf greitt atkvæði um einstök lagafrumvörp. Þingmenn þessa stjórnmálaafls væru síðan skyldugir til að greiða atkvæði á Alþingi í samræmi við vilja meirihluta þjóðarinnar.  Einnig gæti almenningur og hagsmunasamtök samið frumvörp sem þingmenn flokksins myndu þá leggja fram á Alþingi. 

Til að fá sitt aðalmál í gegn gæti viðkomandi flokkur farið í ríkistjórnarsamstarf gegn því að hinn/hinir stjórnarflokkarnir myndu samþykkja frumvarpið um hina nýja stjórnarskrá.  Engir ráðherrar kæmu hins vegar úr þessum flokki, því gerð yrði krafa um að ráðherrar flokksins yrðu ráðnir á faglegum grunni úr hópi hæfra umsækjenda sem ekki sætu á Alþingi, eða þá að þjóðin fengi að kjósa ráðherra flokksins í gegnum sama vefkosningakerfi.  Öll stjórnarfrumvörp sem ráðherrar legðu fram fengju sömu meðferð hjá flokknum, þ.e. þjóðin fengi að segja sína skoðun (kjósa) um þau og flokkurinn síðan greiða atkvæði í samræmi við þá niðurstöðu.  Fyrir fjárlagafrumvarpið væri hægt að búa til sér vefkosningakerfi, þar sem hver og einn fengi að taka þátt í að ráðstafa tekjum ríkisins í þá flokka sem sér þættu mikilvægir.  Nokkuð flókið mál tæknilega, en ekki óleysanlegt. 

Með þessu móti gætu kjósendur þrýst inn beinu lýðræði á Alþingi í næstu kosningum.  Þeir sem bjóða sig fram fyrir hinn nýja flokk/hreyfingu þyrftu að sverja þess eið að þeirra samviska væri að greiða alltaf akvæði eftir vilji þjóðarinnar, en í núverandi stjórnarskrá, þá eru þingmenn aðeins bundnir af eigin samvisku.  Þetta þyrfti að útfæra nánar og tryggja að einstakir þingmenn flokksins færu ekki á egó valdaflipp og snérust gegn þjóðinni.

Ég vil endilega vinna að slíkum hugmyndum og öðrum, þannig að Egill, ef þú veist um hreyfingu, félag eða fund til viðbótar við þennan nýja vef þar sem þetta er tíl umræðu, látu mig þá endilega vita ([e-mail]) 

Ég þekki aðila sem hafa tæknilega getu og þekkingu til að setja upp  vefkosningakerfi sem gæti nýst í svona flokki.  En Wiki er mikilvæg byrjun.

Ég vil óska þjóðinni til hamingju með nýjan vef lydveldisbyltingin.is og vona að sem flestir taki þátt.

[Geir Guðmundsson (IP-tala skráð) 13.1.2009 kl. 03:00]

Ég vil taka það fram að það stjórnlagaþing sem ég er að tala um hér að ofan yrði að vera algjörlega sjálfsprottið úr grasrótinni og kæmi ekki frá núverandi stjórnmálaöflum. 

Eðlilegt er að gera þá kröfu að hvorki núverandi, né fyrrverandi stjórnmálamenn, embættismenn né dómarar fengju að bjóða stig fram sem fulltrúa á stjórnlagaþing.  Mikilvægt er að þjóðin fengi að kjósa sína fulltrúa á stjórnlagþing sem einstaklinga en ekki flokka.  Hver kjósandi gæti t.d. valið ákveðinn fjölda frambjóðenda og jafnvel raðað þeim í röð. Þeir frambjóðendur sem fengju flest atkvæði í þessari sérstöku kosningu til stjórnlagaþings mynduðu þingið. 

Mikil umræða þyrfti að fara fram áður (t.d. á vefnum lydveldisbyltingin.is) hvernig best væri að slíkt stjórnlagaþing færi fram og mögulegt væri að sækja fyrirmyndir til annarra landa.

Þetta yrði bylting.  Þjóðin einfaldlega sniðgengur Alþingi og setur sér nýja stjórnarskrá sjálf á lýðræðislegan hátt.  Eitthvað sem hefði átt að vera búið að gera fyrir löngu.

[Gunnar Skúli Ármannsson, 13.1.2009 kl. 08:27]

Mjög góð hugmynd, verð í bandi.

[Gísli Tryggvason, 13.1.2009 kl. 08:48]

Hér er uppskrift mín að stjórnlagaþingi í 12 skrefum: Þjóðfundurinn 2009 í kjölfar greinar formanns stjórnarskrárnefndar. Beinna verður lýðræðið ekki en að þjóðin sjálf ákveði grundvöll nýs þjóðskipulags. 

[Gísli Gunnlaugsson, 13.1.2009 kl. 09:44]

Mér líst vel á þetta.  Best væri ef hægt væri að halda núverandi og fyrrverandi pólitíkusum fyrir utan umræðuna.

[Kristján Logason, 13.1.2009 kl. 09:46]

Eins vel og stjórnlagaþing hlómar er ekki víst að slíkt gangi upp. ég sé fyrir mér að upp myndi hefjast mikil barátta núverandi stjórnarafla og ráðandi manna yfir því að koma sínum öflum að. óttast ég mjög að í slíku kosningakerfi yrðu enn og aftur peningaöflin sem réðu. Þeir sem greiðastan aðgang ættu að fjölmiðlum og fé hefðu til auglýsinga. Því væri tiltölulega auðvelt að skrumskæla lýðræðið. Ekki þarf að horfa nema til USA til að sjá slíkt, eða þöggun fjölmiðla hér heima.

Af hverju fjallar enginn miðill í dag um þær alvarlegu ásakanir sem fram komu í gær i garð ráðhera um hótanir

Hugmyndin um grasrótina og vinnu hennar jafn útópísk og hún er, hljómar vel. Við erum í súrrealísku ástandi núna og allt er betra en núverandi ekki gera neitt ástand. Ég er á því að nú sé lag. Fólk hefur fengið nóg og mikil þörf er fyrir breytingar. Breytingarnar verða að koma frá fólkinu og finna þarf þeirra hugmyndavinnu farveg. Fólk þarf að trúa á stjórnkerfið að nýju og það gerist aðeins ef tekið er tillit til þeirra hugmynda og breytingar gerðar.

Hér er um margt vandasamt verk á ferð. Auðvelt er að koma fram hugmyndum og móta í gegnum wiki formið en hvernig leggja skal þær í dóm þjóðar er svo aftur vandi. Vef formið hljómar spennandi en allt sem rafrænt er er líka á auðveldan máta hægt að skrumskæla og ráðskast með. Í raun mun auðveldara heldur en pappír.

Það er því ekki eftir neinu að bíða heldur leggja af stað í hugmynda og mótunar vinnu og finna hugmyndum farveg. Til er ég, enda í jafn miklu gamni og alvöru haldið því fram að stofna þyrfti "Bara" flokkinn. Bar eitt markmið. Bara eitt kjörtímabil. Bara eitt verkefni. LÝÐRÆÐI.

[Bjarki S (IP-tala skráð) 13.1.2009 kl. 13:56]

Mér finnst frábært að sjá þessa góðu hugmynd vera að takast á loft. Ég er líka hrifinn af því að nota Wikikerfi sem samráðsvettvang. Ég hef verið stjórnandi á bæði íslensku og ensku Wikipedíu og þekki það kerfi ágætlega.

Stjórnlagaþing og sjálfseyðingarflokkurinn útiloka ekki hvort annað. Stjórnmálamenn hafa aldrei haft áhuga á að gera róttækar breytingar á stjórnskipan landsins, nokkrar stjórnarskrárnefndir hafa verið skipaðar í gegnum tíðina til að gera tillögur um mögulegar breytingar og ég held að flestar hafi þær verið álíka daufar og þessi sem nú situr. Það er löngu fullreynt að láta atvinnustjórnmálamenn stýra þessu ferli. Hugmynd Gísla Tryggvasonar er bjartsýn en ég tel því miður litlar líkur á að hún verði að veruleika, til þess þarf eðli okkar kjörnu fulltrúa að stökkbreytast frá því sem nú er. Ég nenni ekki að bíða eftir því. Ef svo ólíklega vill til að boðað verður til stjórnlagaþings þá nýtist hugmyndin um sjálfseyðingarframboð jafnmikið þar eins og hún gerir við alþingiskosningar. Framboðið hefði þá það markmið að ná áhrifum á stjórnlagaþinginu til að koma í gegn vel afmörkuðum grundvallarmálum varðandi íslenska stjórnskipan.

[Sigurgeir (IP-tala skráð) 13.1.2009 kl. 15:25]

    Þetta er afar þörf og góð umræða. Í sambandi við stjórnarskrána. Er ekki varasamt að hrófla við þeirri gömlu núna? Hún er nokkuð góð, en hefur ekki verið virt nógu vel.  Samning nýrrar er mikið vandaverk. Er tími til þess? Það hafa margar nefndir reynt að bæta hana, en ekkert gengið.

Sigurgeir

[Katrín Snæhólm Baldursdóttir, 13.1.2009 kl. 19:43]

Frábær hugmynd og í guðanna bænum höldum stjórnamálamönnum utan við þetta stóra verkefni. Það er þjóðin sjálf sem á að fá að móta framtíðina og standa saman að því hvernig hún vill hafa samfélagið sitt. Þetta eru örlagatímar og grasrótin er farin af stað og það mun vonandi ekkert stöðva þennan kraft sem nú er að leysast úr læðingi okkur öllum til heilla!!

[Egill Jóhannsson, 13.1.2009 kl. 23:10]

Takk fyrir innleggin. Nú er vefurinn kominn og frábært væri að fá aðstoð þeirra sem þekkja vel til þessa wiki forms.

Bjarki, viltu senda póst á [e-mail] ef þú gætir hjálpað við admin á vefnum? Vefurinn er undir léninu lydveldisbyltingin.is.

Hafið í huga að allt er gert on-line og því er þetta auðvitað dáldið hrátt í byrjun. En það er okkar og ykkar að fylla í eyðurnar.