Brimborg flytur inn etanól bíla. Olís E85 eldsneytið

Eins og kom fram í frétt Sjónvarpsins, stod2, á mbl.is, á ruv.is og á visi.is þá hefur Brimborg ákveðið að flytja inn tvo etanól bíla í tilraunaskyni sem ganga fyrir eldsneytinu E85 sem er blanda etanóls (85%) og bensíns (15%). Ákvörðunin er tekin eftir 8 mánaða vinnu þar sem rætt hefur verið við stjórnvöld, t.d. erindi send á Alþingi sbr. hér og hér, olíufélög, embættismenn, umhverfissérfræðinga, neytendafrömuði og marga fleiri. Tilgangurinn er að kanna kosti þess að hefja sölu á etanól bílum hér á landi en vinsældir þeirra hafa aukist gífurlega í Svíþjóð. Þar eru nú 61.000 etanól bílar á götunum og 870 bensínstöðvar sem bjóða etanól.

Ástæðan fyrir þessum gífurlega góða árangri í Svíþjóð er markviss vinna stjórnvalda með hagsmunaaðilum eins og bílaumboðum, neytendasamtökum, umhverfissamtökum, framleiðendum etanóls, o.s.frv. Stjórnvöld í Svíþjóð hafa beitt ýmsum aðferðum til að hvetja til sölu á etanól bílum eins og fríum bílastæðum, skattaívilnunum, lægri gjöldum á þessa bíla og síðast en ekki síst hafa þau sett reglur um að olíufélög þurfa að bjóða upp á a.m.k. einn vistvænan orkukost á hverri stöð yfir ákveðinni stærð. Olíufélögin í Svíþjóð hafa valið etanól því sá kostur er auðveldastur í dreifingu, lægri kostnaður samfara dreifingunni og því ódýrari fyrir bíleigendur. Einnig er talið að etanól væðingin geti flýtt fyrir vetnisvæðingunni þegar að því kemur eftir 10-12 ár.

Bílaframleiðendurnir Volvo, Ford og Saab hafa náð mjög mikilli hlutdeild á sænska markaðnum með etanól bíla og býður Volvo nú 3 gerðir og Ford 2 en bíll af Ford etanól gerð var einmitt valinn annar af umhverfisvænustu bílum heims um daginn. Brimborg getur pantað allar þessar gerðir strax og hefur sýnt það með því að taka það skref að panta þessa tvo bíla. Á næsta ári getur Brimborg boðið 10 gerðir etanól bíla ef verkefnið tekst vel og olíufélögin hefja dreifingu á landsvísu.

En það er til lítils að flytja inn bílana ef ekkert er eldsneytið. Brimborg hefur náð samningum við Olís um að félagið flytji inn E85 fyrir Brimborg í þetta tilraunaverkefni og þá mun einmitt reyna á það hvaða gjöld stjórnvöld muni leggja á þetta eldsneyti. Stjórnvöld tóku gott skref þegar ákveðið var að metangasið skyldi vera án gjalda og býst Brimborg við að stjórnvöld sýni þessu eldsneyti sama skilning.

Þeir bílar sem Brimborg er að fá til landsins eru þessir:

Volvo C30 með 1,8 lítra Flexifuel vél sem gengur fyrir E85 (85% etanóli og 15% bensíni). Þetta er minnsti bíllinn í Volvo línunni, sportlegur bíll, 2 dyra. Í grunninn er um sama bíl að ræða og sambærilegan bensínbíl og er búnaður sá sami og verðið verður mjög svipað. Endanlegt verð verður uppgefið í ágúst þegar bíllinn kemur. Nánar um Volvo C30.

Ford C-Max með 1,8 lítra Flexifuel vél sem gengur fyrir E85 (85% etanóli og 15% bensíni). Þetta er fjölskyldubíll sem tekur 5 manns rúmt í sæti og er með gott skott. Eins og með Volvo bílinn er í grunninn um sama bíla að ræða og bensínbílinn af sömu gerð, búnaður sá sami og verðið líka svipað en endanlegt verð verður uppgefið í ágúst þegar bíllinn kemur. Nánar um Ford C-Max.

Eins og áður segir eru etanól bílar í megindráttum eins og sambærilegir bensínbílar. Munurinn felst í bensíntanki úr öðrum efnum (samt bara einn tankur) og öflugri vélartölvu. Vélartölva etanól bíla er afar fullkomin og nemur styrk blöndunar og því skiptir ekki máli ef dreifikerfi etanóls er ekki nægjanlega þétt í upphafi. Þá er ekkert mál að bæta á hreinu bensíni og fylla síðan á með E85 þegar þannig dæla er í sjónmáli. Þetta er mikilvægt á meðan á uppbyggingu dreifikerfisins stendur. Etanól bílar losa allt að 75% minna koltvíoxíð en sambærilegir bensínbílar ef miðað er við lífsferil etanólsins og þeir gefa ekki frá sér neitt svifryk.

Flytja inn etanól

Esjumelar og Tungumelar: Ný athafnasvæði á höfuðborgarsvæðinu

Ég fékk áhugaverðan markpóst frá verktakafyrirtækinu Ístaki. Með bréfinu fylgdi bæklingur þar sem kynnt er nýtt athafnasvæði á Tungumelum í Mosfellsbæ. Svæðið er hugsað fyrir atvinnuhúsnæði og er 33 hektarar að stærð og skipulagt af Ístaki. Hugmyndir Ístaks eru áhugaverðar og í algeru samræmi við hugmyndir Brimborgar sem hefur einmitt fengið úthlutað risalóð við Esjumela við rætur Esju (ofan Kollafjarðar), næsta bæ við Tungumela, fyrir Volvo atvinnutækjadeildir sínar.

Í kynningu Ístaks segir; "Greið leið liggur frá Tungumelum um allt höfuðborgarsvæðið og tenging við landsbyggðina er mjög góð. Með Sundabraut, tvöföldun Vesturlandsvegar og Hvalfjarðarganga ásamt eflingu Grundartangarhafnar verður staðsetning Tungumela enn dýrmætari. Þaðan er stutt í alla þjónustu og margvisleg tækifæri til hollrar útivistar og afþreyingar"

Þetta er mjög gott framtak hjá Ístaki og mjög eðlileg þróun á höfuðborgarsvæðinu þar sem sífellt minna úrval er um góðar atvinnuhúsalóðir og skynsamlegt að fyrirtæki færi sig í útjaðar byggðar þar sem lóðir eru ódýrari og möguleikar á rýmra athafnasvæði.

Við hjá Brimborg fórum einmitt í stefnumótunarvinnu á árunum 2004/2005 um staðsetningu hinnar ýmsu starfsemi félagsins. Niðurstaðan var sú að þetta svæði væri góður kostur og sótti fyrirtækið um lóð til Reykjavíkurborgar. Fékk Brimborg úthlutað 34.000 fermetra lóð á Esjumelum, nánar tiltekið Lækjarmel 1 en það svæði er mjög nálægt svæði Ístaks. Er ég sannfærður um að bæði svæðin munu styrkja hvort annað.

Það vekur athygli í kynningu Ístaks sú áhersla sem verktakafyrirtækið setur á samgöngur og mikilvægi þeirra við uppbyggingu á svæðinu. Ég tek undir það og tel að Sundabraut og tvöföldun Vesturlandsvegar og Hvalfjarðarganga muni færa byggðir nær hvor annarri og færa okkur ýmsa möguleika sem ekki sjást endilega á teikniborðinu í dag.

Stefnir Brimborg að því að flytja Volvo atvinnutækjadeildir félagins upp á Esjumela en þar er um að ræða sölu og þjónustu við Volvo vörubíla, Volvo vinnuvélar og Volvo Penta bátavélar og er frumhönnun húsnæðis og lóðar þegar hafin.

Ford vetnisbílar í fjöldaframleiðslu innan 5 ára

Ford Motor Company vinnur að þróun visthæfra bíla á mörgum sviðum t.d. bílum sem ganga fyrir etanóli, rafmagni og vetni. Í frétt í dag á vefmiðlinum Detroit news er fjallað um eitt af vetnisverkefnum Ford en 30 Ford rútur eru nú í prófun víðsvegar um Bandaríkin og Kanada.

Ef þessir Ford bílar eru bornir saman við vetnisbílinn sem nú var verið að kynna hér á landi er munurinn sá að bílarnir frá Ford nota í grunninn hefðbundinn sprengihreyfil enn hinn bíllinn efnarafal (fuel cell). Ford vinnur einnig að þróun vetnisbíla sem nýta efnarafala tækni en kosturinn við að nýta sprengihreyfilinn er að þá nýtist öll sú fjárfesting sem er til staðar í bílum í dag.

Haft er eftir fulltrúa Ford að Ford Motor Company sé komið það langt í þróun þessarar vetnistækni að fjöldaframleiðsla fyrir almennan markað gæti hafist innan 5 ára að gefnum nokkrum skilyrðum. Þau eru helst þessi og þau þarf að leysa áður en almenn útbreiðsla getur orðið að veruleika:

1. Betri tækni þarf til að geyma vetnið í bílunum þ.e. tekur of mikið pláss í dag

2. Uppfræða þarf almenning um eðli vetnis og hvernig skal umgangast það

3. Dreifkerfið er ekki til staðar og það þarf byggja það upp

4. Verð á jarðefnaeldsneyti, bensíni og dísel þarf í raun að haldast hátt eða hækka

Því er líklegt að 10-12 ár líði áður en vetnisbílar verði almennt raunhæfir fyrir allan almenning en tilraunir eins og Nýorka stendur fyrir eru mikilvægar til að flýta þróun og kynna þessa tækni fyrir almenningi. Til að flýta fyrir innleiðingu er mikilvægt að stjórnvöld komi að málinu en þá er mjög mikilvægt að hafa í huga að stjórnvöld ættu ekki að hygla ákveðinni tækni umfram aðra. Stjórnvöld ættu frekar að setja almenn markmið um minnkun á losun koltívoxíðs eða minni eyðslu og síðan láta markaðinn finna þá tækni sem best hentar m.t.t. verðs og gæða.

Það er nokkrar leiðir tiltækar núna í dag til að draga úr notkun á jarðefnaeldsneyti, þ.e. bensíni og dísel. Þessar leiðir hafa verið nefndar hér á þessu bloggi en þær eru í stuttu máli. Sparneytnari bensínbílar og díselbílar eru auðvitað fyrsti kosturinn og þeim fjölgar ört og metanverkefni Sorpu og Metans er einn góður kostur. En sá endurnýjanlegi orkugjafi sem auðveldast er að innleiða fljótt er etanól en Svíar hafa einmitt náð miklum árangri á því sviði. Líklegt er að forskot þeirra á sviði etanól bíla muni í framhaldi hjálpa þeim að ná forskoti á sviði vetnisbíla líka.

Í dag fjöldaframleiða margir bílaframleiðendur etanól bíla og á næstu 1-2 árum mun þeim fjölga gífurlega. Þarna er tækifæri til að innleiða mjög fljótt bíla sem brenna litlu sem engu bensíni og draga úr losun á koltívoxíði um 75% m.v. sambærilega bensínbíla ef miðað er við lífsferil etanólsins. En það er mikilvægt að hafa í huga að alls ekki má líta á alla þessi kosti sem gagnkvæmt útilokandi heldur verða þeir líklega allir innleiddir á næstu árum. Flóran verður fjölbreytt í framtíðinni. Á því er enginn vafi.

Fyrsti vetnisfólksbílinn tekinn í gagnið

Ford segir tengil-tvíorkubíla koma á markað eftir 5-10 ár

Ford Motor Company og Southern Californina Edison orkufyrirtækið skrifuðu fyrr í vikunni undir samning um samstarf við rannsóknir og þróun á svokölluðum tengil-tvíorkubílum (plug-in electric hybrids).

Í grófum dráttum eru það bílar sem ganga fyrir tveimur orkugjöfum og hafa tvær vélar (sbr. tvíorkubíll) og er annar orkugjafinn alltaf rafmagn sem knýr rafmótor en samhliða er um að ræða t.d. bensín, dísel, vetni, etanól o.s.frv sem knýr hina vélina. Bílarnir nýta hemlaorkuna til að hlaða rafgeyma sem hýsa rafmagnið en að auki verður hægt að stinga þeim í samband og hlaða t.d. yfir nótt. Ef rafmagnið klárast þá tekur hinn mótorinn við og þá er hemlaorkan nýtt til að hlaða rafgeyma.

Í dag eru á markaði tvíorku-bílar sem ganga fyrir bensíni og rafmagni eins og t.d. Ford Escape hybrid og Toyota Prius hybrid. Helsti ókostur þeirra er sá að þar sem ekki er hægt að hlaða rafgeyma þessara bíla þá draga þeir styttra á rafmagni og hámarkshraði á rafmótor er yfirleitt um 25 mílur eða aðeins 40 km. / klst. Því henta þeir aðeins til notkunar í innanbæjarakstri á undir 40 km. hraða ef markmið um eyðslu og losun koltvíoxíðs eiga að nást. Einnig eru þeir búnir hefðbundnum rafgeymum sem hýsa minni orku og mengun við framleiðslu þeirra og eyðingu er mikil.

Við undirskrift samningsins lýsti forstjóri Ford, Alan Mulally, því yfir að tengil-tvíorkubílar yrðu komnir í fjöldaframleiðslu og sölu á næstu 5-10 árum. Stærsti þröskuldurinn er þróun rafgeyma eins og Mulally segir í viðtali við Automotive news;

"...Mulally cautioned that the commercial rollout of the still experimental vehicles depends on advances in battery technology, an assessment shared by other rival automakers..."

Vonir eru bundnar við lithium-ion rafgeyma eins og notaðir eru í fartölvur. Eitt af mörgum vandamálum sem þarf að yfirstíga við þá tækni er mikill hiti sem myndast við notkun þessara rafhlaðna en öryggiskröfur við þróun bíla eru mun meiri en við þróun tölva.

Ný rannsókn staðfestir að breyting í virkni sólar skýrir ekki hraðari hlýnunar jarðar

Nokkrar deilur hafa staðið um það hvort tíðræddar loftlagsbreytingar séu af mannavöldum eða hreinlega af nátttúrunnar völdum. Í umdeildri mynd, The Great Global Warming Swindle, var því haldið fram að t.d. aukin virkni sólar væri ein af stórum ástæðum þessarar hlýnunar. Nú hefur ný rannsókn leitt í ljós að svo getur ekki verið. Frá 1980 hefur virkni sólar minnkað en hitastig jarðar aukist jafnt og þétt.

Fyrrum Boeing stjóri nú forstjóri Ford

Alan Mulally, núverandi forstjóri Ford og fyrrum stjóri Boeing var maðurinn að baki endurkomu Boeing sem hafði átt í miklum erfiðleikum og bar einmitt ábyrgð á þeirri ákvörðun að hefja þróun og framleiðslu á 787 Dreamliner vélinni en aldrei áður hefur Boeing náð jafn góðum árangri með nokkra nýja vél.

Miklar vonir eru bundnar við Mulally hjá Ford Motor Company í kjölfar frábærs árangurs hjá Boeing og hefur verð hlutabréfa í félaginu hækkað nokkuð síðan hann tók við stjórnartaumum í sept. 2006. Hann hefur síðan þá leitt fyrirtækið í gegnum miklar breytingar. Eitt af markmiðum hans er að flýta þróunarferli nýrra bíla eins og hann gerði hjá Boeing og er nú stefnt að því að 70% bílgerða fyrirtækisins verði nýjar eða verulega endurbættar fyrir árslok 2008. Fyrir árslok 2010 verði allar gerðirnar nýjar eða verulega endurbættar. Einnig leggur hann mikla áherslu á bætt gæði og í nýrri J.D. Power gæðakönnun átti Ford Motor Company flestar gerðir bíla í einhverjum af þremur efstu sætum í 14 flokkum.

Ford leggur einnig gífurlega áherslu á að flýta þróun vistvænni bíla en fyrirtækið var fyrst til að koma með á markað jeppa sem byggði á tvinn tækni en það er Ford Escape og önnur kynslóð þess bíls kom á markað nú í vor. Ford er mjög framarlega í þróun og framleiðslu á etanól bílum og vinnur einnig að þróun svokallaðra tengil-tvíorkubíla og kynnti fyrr á árinu Ford Edge af þeirri gerð. Líklegt er að tengil-tvíorkubílar Ford muni geta gengið fyrir vetni, bensíni, dísel og etanóli ásamt rafmagni.

35 nýjar pantanir i Boeing 787 Dreamliner

...í opna skjöldu

Hún lætur ekki að sér hæða náttúran á Íslandi og getur auðveldlega komið manni í opna skjöldu. Aldrei of varlega farið. Ég var einmitt í góðum hóp 20 manna sem var að koma úr göngu frá botni Veiðileysufjarðar og yfir í Hornbjargsvita. Á öðrum degi var gengið í Hornvík og á Hornbjarg og til baka í vitann og á þriðja degi frá vitanum til móts við bát sem beið okkar í botni Lónafjarðar. Erfiðara svæði yfirferðar en ég bjóst við og mun meiri snjór á leiðinni, jafnvel niður í fjöru, en mig hafði órað fyrir og við erum að tala um júlí. Allt gekk þó vel en það er fleira sem getur komið manni í opna skjöldu.

Á einni dagleiðinni snéri ég við í vitann aðeins fyrr en hópurinn með þrjá yngstu meðlimi hópsins sem voru orðin þreytt. Á leiðinni átti ég þetta samtal við 8 ára dóttur vinahjóna okkar sem er málgefin og spurul með afbrigðum.

Stelpa: Er konan þín i kór?
Ég: Nei
Stelpa: Gerir hún ekkert?
Ég: Jú, hún er t.d. dugleg að fara í gönguferðir eins og þessa
Stelpa: Fer hún í ræktina?
Ég: Já, hún gerir það
Stelpa: Ferð þú í ræktina?
Ég: Ég hef nú verið frekar latur við það undanfarið
Stelpa: Afi er rosalega feitur. Hann fer ekki í ræktina.
Ég (hugsi): I didn´t see that coming

Hún kom mér sannarlega í opna skjöldu þarna og því var ég á varðbergi og hugleiddi hvert það myndi leiða þegar hún spurði aðeins seinna; "Vinnur þú í Seglagerðinni Ægi?"

Ferðafólki bjargað heilu á höldnu í Þórsmörk

Sundabraut: Hvað sögðu stjórnmálamenn fyrir kosningar?

Nú heyrist að færa eigi, í aðrar framkvæmdir, það fé sem var búið að eyrnamerkja Sundabraut og því haldið fram að þessi tilfærsla fjármuna muni ekki fresta framkvæmdum við Sundabraut. Rökin eru sögð vera þau að framkvæmdin sé enn á undirbúningsstigi. Ég er ekki sammála þessu mati enda hægt að byrja strax á Sundabraut Kollafjarðarmegin og því kemur þessi umræða mjög á óvart, sérstaklega í því ljósi að öll stjórnmálaöflin í landinu voru sammála um að Sundabraut ætti að njóta forgangs umfram aðrar framkvæmdir.

Geir Haarde forsætisráðherra segir í viðtali í Morgunblaðinu í dag, laugardag 7. júlí, "Fjárveitingar til Sundabrautar falla undir þetta. Forsætisráðherra segir að fjárveitingar í það verkefni séu rýmri en hægt sé að nýta á þessu og næsta ári og því sé skynsamlegra að nýta þá peninga í annað í stað þess að geyma þá. Hins vegar muni fjármunirnir skila sér til baka því þau verk sem talað sé um að flýta séu með fjárveitingar. "En ég vil undirstrika það að þessi ákvörðun verður ekki til þess að tefja Sundabraut umfram það sem ella hefði verið," segir hann. "

í þessu samhengi er athyglisvert að skoða myndbandið af umræðum fulltrúa stjórnmálaflokkana um Sundabraut og Suðurlandsveg á framboðsfundi í Brimborg þann 7. maí síðastliðinn, fimm dögum fyrir kosningar. Fulltrúar allra stjórnmálaflokka voru sammála um að Sundabraut væri forgangsverkefni og hægt væri að klára hana á 3-5 árum. Össur Skarphéðinsson nefndi að hægt væri að byrja á báðum endum brautarinnar í einu og stytta þannig heildarframkvæmdatíma og ná jafnvel að ljúka framkvæmdum á þremur árum.

Þetta er góð hugmynd að mínu mati og nú er tækifæri fyrir Össur að beita áhrifum sínum í ríkisstjórn og koma hugmyndinni í framkvæmd. Í raun væri hægt, eins og áður segir, að byrja strax á Sundabraut Kollafjarðarmegin og tvöfalda veginn þaðan og upp að Hvalfjarðargöngum á meðan umhverfismat fer fram Reykjavíkurmegin.

Viðtæk samstaða er um það að Sundabraut þarf að koma og það fljótt og má í því samhengi nefna margar ályktanir t.d. frá, Borgarráði Reykjavíkurborgar, Faxaflóahöfnum og Bílgreinasambandinu. Nú þurfa stjórnmálamennirnir að láta verkin tala.

Til upplýsingar: Reykjavíkurborg hefur tekið saman margvíslegt efni um Sundabraut.

Samdráttur á bílamarkaði 20% á fyrri helmingi ársins

Tölur frá Umferðarstofu um nýskráningar nýrra bíla hér á landi fyrstu 6 mánuði ársins sýna að samdráttur á markaðnum er 19,9% og er þetta svipaður eða heldur minni samdráttur en spár aðila á markaðnum gerðu ráð fyrir. Aftur á móti er mun meiri samdráttur í innflutningi notaðra bíla eða 31% fyrstu 6 mánuði ársins.

Sala á fólksbílum minnkaði um -22,7% fyrstu 6 mánuði ársins eða úr 10.984 bílum í 8.487 bíla og er þessi samdráttur nánast samhljóða spám sem voru á bilinu -20% til -26%. Sala á atvinnubílum jókst aftur á móti lítilega og fór úr 1457 bílum í 1479 bíla og jókst því um 1,5%. Heildarsamdráttur á bílamarkaði er því eins og áður segir -19,9% og voru nýskráðir bílar alls 12441 á tímabilinu.

Í júní einum minnkaði sala fólksbíla um -10,9% miðað við sama mánuð í fyrra og voru skráðir 2327 fólksbílar í mánuðinum en 2612 í fyrra. Sala atvinnubíla jókst verulega eða um 25,7% og voru skráðir 337 atvinnubílar á móti 268 bílum í fyrra. Heildarfjöldi nýskráninga í júní á þessu ári voru því 2664 en 2880 á sama tíma í fyrra og var heildarsamdráttur í júní því -7,5%.

Það virðist því sem einstaklingar hafi frekar dregið úr bílakaupum en fyrirtækin hafi haldið áfram að fjárfesta enda umsvifin í efnahagslífinu meiri en flestir gerðu ráð fyrir og spilar þar eflaust inní að krónan er sterkari en spár gerðu ráð fyrir. Á það skal bent að kaup bílaleiga á fólksbílum falla undir skráningar fólksbíla og því gæti samdráttur í kaupum einstaklinga jafnvel verið aðeins meiri því reiknað er með aukningu í sölu til bílaleiga á árinu.

Skilgreining: Í tölunum hér að ofan er heildarmarkaðurinn skilgreindur sem allir fólksbílar, jeppar, rútur, sendibílar. pallbílar og vörubifreiðar undir 16 tonnum í heildarþyngd.